E proseguen as reivindicacións da Plataforma pola Sanidade Pública do Barbanza, que se concentrou esta semana no hospital comarcal para denunciar “as prolongadas demoras na agarda en atención especializada” e esixir unha xuntanza co xerente da Área Sanitaria e co director do Hospital do Barbanza. As mobilizacións derivaron nun peche indefinido, con boa parte das e dos participantes pasando a noite deste mércores e a madrugada do xoves no centro hospitalario.
Ao mesmo tempo, recollen apoios (sinaturas) nas súa reclamacións e fan un chamamento veciñal á participación.
O peche comezou este martes a xeito de concentración matinal de seis horas e prolongouse logo coas quendas do peche indefinido. Acordouse amplificar as reivindicacións ante “o silencio respecto da petición dunha reunión”. Segundo advertiu a plataforma a primeira hora deste xoves, o peche “continuará até que se reúnan co xerente da área sanitaria e co director do hospital para falar das listas espera reais e como abordar a súa dimensión”.
Na protesta participan diversos representantes políticos do Barbanza, como o alcalde da Pobra, José Carlos Vidal (Nós Pobra) e a segunda tenente alcalde da Pobra, Patricia Lojo (PSOE).
Tamén o BNG mostrou o seu firme apoio a estas reivindicacións, a través do ex-alcalde ribeirán Luís Pérez Barral, que denunciou “a situación límite da nosa sanidade con demoras inasumíbeis nas consultas de especialistas causadas pola falta de persoal médico e do desmantelamento progresivo da sanidade pública”. Dende o grupo esixen “transparencia nas listas de espera, que non suman todos os datos que posúe a Consellería de Sanidade para vender á poboación unha imaxe falsa de estabilidade e eficacia na Administración sanitaria”.
Pérez Barral sumouse á estadía indefinida no hospital “xunto a compañeiras e compañeiros do Bloque e outra moita xente comprometida coa defensa da sanidade pública”. Mostrou o seu convencemento de “que esta mobilización, feita desde a xente, é o camiño para conseguir melloras no servizo galego de saúde. A forza da veciñanza é a que move todo isto, e será esa mesma forza a que arranque as melloras que a nosa sanidade precisa”.
