A Plataforma Defensa Sanidade Pública Barbanza cumpriu xa seis noites de peche nas instalacións sanitarias do Hospital da Barbanza, nunha protesta coa que buscan abrir un diálogo coa xerencia da área sanitaria e a dirección do centro.
O colectivo reclama transparencia nas listas de espera e medidas reais para reducir os tempos de atención.
Denuncian “as prolongadas demoras na agarda en atención especializada” e esixen, como dixemos, unha xuntanza co xerente da Área Sanitaria e co director do Hospital do Barbanza.
Dende a Plataforma explicaron este martes 28 de abril nun breve comunicado que “hoxe fan 816 días dende que solicitamos por primeira vez reunirnos co xerente de área e o director do hospital, e 6 días de peche. Só queremos reunirnos co xerente da área sanitaria e o director do hospital para falar das listas de espera reais e como abordar a súa diminución”.
Este martes 28 de abril ás 12.00 horas, diante do Hospital de Barbanza, terá lugar o enterro da sanidade pública.
O peche comezou o pasado martes 21 a xeito de concentración matinal de seis horas e prolongouse logo coas quendas do peche indefinido. Acordouse amplificar as reivindicacións ante “o silencio respecto da petición dunha reunión”. Segundo advertiu a plataforma a primeira hora deste xoves, o peche “continuará até que se reúnan co xerente da área sanitaria e co director do hospital para falar das listas espera reais e como abordar a súa dimensión”.
