O presidente de Portos de Galicia, José Antonio Álvarez, mantivo este martes 21 de abril unha reunión coa nova directiva do Real Club Náutico de Portosín, que preside José Codesido, para afondar en diferentes propostas de mellora das instalacións da entidade deportiva do municipio sonense.
No encontro, a nova directiva do club, recentemente nomeada para o período 2026-2030, mostrou o seu propósito de ampliar os peiraos flotantes (pantaláns) 1 e 3 para dar cabida a novas prazas de atraque, así como renovar o pilotaxe das instalacións flotantes actuais. Así mesmo informaron de que están a traballar nun proxecto para agrandar o travellift.
Pola súa parte, o presidente de Portos ratificou que o ente público tramitará os permisos necesarios para facilitar a execución destas melloras por parte da entidade. Finalmente, ambas partes abordaron tamén posíbeis espazos para a instalación dunha mariña seca.
