O Concello de Padrón afronta esta fin de semana a recta final das Festas de Pascua 2026, que se despedirán cun amplo programa de actividades no que a música, a tradición e o deporte volverán ser protagonistas. As xornadas de sábado e domingo de Pascuilla reunirán actuacións de orquestras, música tradicional, eventos culturais e unha destacada cita deportiva internacional, consolidando unha edición que está a rexistrar unha das maiores afluencias de visitantes dos últimos anos.
Segundo explicou o Concello, u dos momentos máis especiais desta última fin de semana será a presenza dos catro grupos folclóricos de Padrón, que volverán encher de música e tradición a praza de Macías, reafirmando o papel das asociacións culturais locais na preservación e difusión do patrimonio musical galego.
A programación comezará o sábado de Pascuilla ás 12.30 horas cunha ruada do grupo folclórico Rosalía de Castro, acompañado de xigantes e cabezudos, que percorrerá as rúas do pobo levando o ambiente festivo a distintos puntos da vila.
Xa pola tarde, a praza de Macías converterase no escenario principal da música tradicional coa actuación da A.C. Rosalía de Castro, ás 18.00 horas, e da A.C. San Pedro de Carcacía, ás 19.30 horas, dúas entidades con ampla traxectoria na promoción da cultura popular.
O domingo de Pascuilla continuará o protagonismo das agrupacións locais. Ás 11.30 horas, o grupo folclórico San Pedro de Carcacía protagonizará unha nova ruada con xigantes e cabezudos, mentres que a música tradicional regresará á praza de Macías coas actuacións da A.C. Arreixeira, ás 12.30 horas, e da A.F.C. O Pedrón, ás 13.30 horas.
“Estas actuacións permiten que a Pascua de Padrón combine o ambiente festivo das grandes verbenas co orgullo pola cultura propia e polo traballo das asociacións culturais da vila”, explicou o Concello.
A xornada do sábado 11 de abril continuará ás 12.45 horas coa sesión vermú do grupo padronés UF75 na praza de Macías e, xa pola noite, a troula trasladarase ao recinto situado ao lado da gardería, onde a orquestra Atenas actuará ás 20.30 horas. Posteriormente, a orquestra La Fórmula ofrecerá a súa actuación ás 22.30 horas na praza Fondo de Vila.
Á medianoite (00.00 horas) celebrarase o tradicional espectáculo de fogos artificiais, tras o que terá lugar o segundo pase de La Fórmula ás 00.15 horas.
A festa prolongarase ata a madrugada no espazo Open Air, coa sesión Remember 90’s-2000’s ás 01.30 horas e a actuación do DJ Jorge Álvarez ás 03.00 horas.
Domingo de Pascuilla: ciclismo internacional e o Festival de Bandas Capital do Sar
O domingo 12 de abril comezará cunha das grandes citas deportivas da programación: a 63ª Clásica de Pascua – XXXVII Memorial Francisco Rodríguez Pazos, que partirá ás 10.00 horas desde o Campus Tecnolóxico Cortizo.
A carreira, cun percorrido de 166 quilómetros, pasará por municipios como Padrón, Rois ou Dodro e alcanza este ano nivel internacional ao integrarse na Challenge Futura coa categoría 1.2 do calendario da UCI.
Ao longo da mañá tamén terá lugar a xuntanza da Irmandade dos Fillos e Amigos de Padrón, que incluirá actos na Igrexa de Santiago, no paseo do Espolón e no Concello.
Xa pola tarde, ás 18.00 horas, a praza de Macías acollerá o XV Festival de Bandas Capital do Sar, que reunirá á Banda Artística de Merza, á Banda de Música de Castrelo-Cambados e á Banda de Música Municipal de Padrón, nun concerto ao aire libre que se ten consolidado como unha das citas culturais máis destacadas da Pascua.
A despedida musical chegará pola noite coas actuacións da orquestra Capitol, ás 20.00 horas na praza Fondo de Vila, e da orquestra Assia, que actuará ás 23.00 horas no recinto situado ao lado da gardería, poñendo o broche final ás festas ata o vindeiro ano.
“O amplo e variado programa de orquestras, actividades culturais e eventos deportivos reflicte o compromiso do Concello de Padrón por manter viva unha das tradicións festivas máis arraigadas da vila”, sinalou o Goberno local, engadindo que “nesta edición, as Festas da Pascua están a rexistrar unha afluencia de público excepcional, cun ambiente constante nas rúas, prazas e recintos festivos, consolidando Padrón como un dos grandes puntos de encontro festivo de Galicia durante estas datas”.
