Juan Caballero (texto). A Real Federación Galega de Motonáutica organiza a segunda proba que puntúa para o Campionato Galego Inclusivo de Motonáutica tendo por escenario, este sábado 11 de abril, a lámina de auga fronte á estación náutica do Freixo.
Tras o arranque, tamén en augas da ría de Muros e Noia o pasado 28 de marzo, tendo como porto de abrigo o Real Club Náutico Portosín, Outes convértese na segunda localidade da comarca que acolle a competición.
Parten como favoritos os vigueses José Luís Fernández e Montserrat Pérez, que gañaron no Son o arranque do campionato, tanto o galego como o nacional, patrocinado polo Grupo Davila.
Séguenlle no medalleiro provisional os lalinenses Cristina García e José Manuel Santiso, e os noieses Joaquín Barrio Guldrís e Joaquín Barrio Bouzas.
Excepcional o nivel demostrado polos pilotos na primeira convocatoria, con éxito de participación, o mesmo que espera no Freixo.
O Campionato Galego Inclusivo de Motonáutica está patrocinado por Deporte Galego da Xunta de Galicia e o Grupo Davila, baixo a organización da Real Federación Galega de Motonáutica e a Asociación ADECO-DEA.
A competición está baseada en probas de destreza e pericia, combinadas con slalom entre boias, con tempo cronometrado e sen soporte tecnolóxico. A hora de inicio está programada ás 10 da mañá e está aberta a todo o público en xeral.
