A ULA Libraría Social vai acoller esta semana, na súa sede de Outes (rúa da Capela), a presentación do libro China, ameaça u esperança? A realidade de uma revolução pragmática. A cita será este venres 17 de abril a partir das 19.30 horas. Contarase coa presenza de Xavier García (autor), escritor e xornalista, e Manel Casal, activista social.
O xornalista galego Xavier García contribúe neste libro a comprender a realidade da China actual, máis alá das distorsións tendenciosas, por desgraza tan comúns nos medios occidentais. A denuncia das campañas mediáticas occidentais para desacreditar a China, o uso descarado do terrorismo en Xinjiang, a eliminación da pobreza extrema, a loita contra a desigualdade, o desenvolvemento tecnolóxico e o inmenso esforzo en políticas ambientais para construír unha civilización ecolóxica son algúns dos aspectos abordados na obra.
Sinopse e contexto
China experimentou unha transformación colosal nos últimos corenta anos. Un cambio xigantesco para o que, con todo, case non hai espazo nos medios occidentais. Un estado que está a piques de destronar os Estados Unidos como a principal potencia económica, que sacou a máis de 800 millóns de persoas da pobreza extrema, quintuplicou a produción de enerxía renovable en dez anos e agora prioriza a redución das desigualdades sociais creadas pola economía de mercado.
A prensa occidental intenta manchar estes logros, xa que o modelo chinés de pragmatismo corre o risco de servir de exemplo para os países atrapados no camiño sen saída do subdesenvolvemento e a desigualdade. Tamén incita o medo ao rexurdimento de China, ignorando intencionadamente que o milenario Imperio Medio nunca mostrou ambicións expansionistas e só raramente fixo a guerra.
Só cunha verdadeira comprensión do que é China hoxe podemos abordar a tarefa de facer do seu ascenso imparable un piar fundamental dunha nova orde mundial máis xusta e pacífica.
