Este sábado 11 de abril temos teatro no Coliseo Noela de Noia: unha peza enmarcada nas Xornadas de Memoria Histórica que organiza o Concello. Trátase de O Mestre, da Asociación Cultural O Xeito (Esteiro), con texto de Xosé Agrelo Hermo, escritor, profesor e editor noiés falecido en 2018, responsábel da editorial Toxosoutos. Será a partir das 20.30 horas, con entrada libre até completar o aforo. A obra, para público maior de 14 anos, é un convite a reflexionar sobre o noso pasado histórico e sobre a memoria colectiva.
O Mestre é un drama escrito por Xosé Agrelo Hermo que conta a historia dun mestre que se atopa dando escola cando estoupa a Guerra Civil. Queren pasalo polas armas algúns a quen el dera clases. Agóchase no faiado durante anos. Estreouse no ano 1978 e foi censurada previamente polo réxime franquista.
A adaptación está dirixida por Xosé Taxes Freire.
