O Real Club Náutico Portosín converterase do 8 ao 10 de maio no epicentro da vela nacional coa celebración do Campionato de España de ILCA Máster, unha cita que reunirá na ría de Muros e Noia a algúns dos mellores regatistas veteranos do panorama internacional.
O evento, organizado pola entidade portosinense, contará coa participación de destacados deportistas, entre eles campións olímpicos e membros históricos do equipo nacional. Entre os nomes máis salientables figuran José Luís Doreste, ouro en Seúl 1988; José María van der Ploeg, ouro en Barcelona 92; e Miguel Noguer, campión olímpico en Moscova 1980, ademais doutros regatistas de ampla traxectoria. Ata o momento xa se formalizaron arredor de 65 inscricións.
A competición desenvolverase nas augas da ría de Muros e Noia, que xa acolleron esta proba en 2021, consolidándose como un escenario de referencia para a vela. O campionato arrancará o 7 de maio coas medicións e confirmación de participantes, antes do inicio oficial das regatas.
Durante a presentación oficial, celebrada no salón principal do club, o comodoro Miguel Reboreda destacou o alto nivel dos participantes e subliñou que “é tamén unha homenaxe ao deporte máster”, incidindo no valor da experiencia e da paixón polo mar que caracteriza aos regatistas desta categoría.
Pola súa banda, a directora territorial da Xunta, María del Mar Ferreiro, puxo en valor o peso de Galicia no ámbito da vela, lembrando que é unha das comunidades con maior número de deportistas de alto nivel. Ademais, salientou a capacidade organizativa do Real Club Náutico Portosín para acoller unha cita destas características.
O director deportivo do club, Sergio del Río, incidiu no perfil dos participantes, destacando a diversidade de idades, con rexatistas que incluso superan os 80 anos, e asegurou que “máis alá da competición, veñen movidos pola paixón polo mar”.
O campionato estrutúrase en diferentes categorías segundo a idade dos participantes, desde Aprendiz Máster (30-44 anos) ata Legends, para maiores de 75 anos, tanto nas clases ILCA 6 como ILCA 7.
Pola súa banda, o Concello de Porto do Son reafirmou o seu apoio ao deporte, tanto na base como na categoría máster, destacando a importancia deste tipo de eventos para a promoción deportiva e turística da zona.
Con esta cita, Portosín reforza a súa posición como referente na organización de eventos náuticos de alto nivel, ao tempo que pon en valor o potencial da ría de Muros e Noia como escenario privilexiado para a práctica da vela.
