O PSdeG-PSOE de Porto do Son anunciou unha campaña de recollida de sinaturas contra a decisión da Xunta de que o Centro de Saúde do municipio estea pechado os sábados pola mañá. Para a agrupación socialista, esta decisión, que afecta tamén a outros centros de saúde da zona como os de Carnota e Mazaricos, é “inaceptábel” ao obrigar a veciñanza “a desprezarse ata a máis de 20 quilómetros de distancia para recibir atención sanitaria”.
E engade o voceiro local socialista, Jorge Romero: “A diferencia de tempo entre acudir ao centro de saúde e ter que ir ao PAC de referencia pode ser clave nos casos de moitas doenzas”.
O portavoz socialista explica que o Centro de Saúde do municipio “abría ata agora os sábados de mañá para urxencias, facer curas ou dar atención a domicilio a quen o precisase”. “Agora haberá que acudir a Noia, a 16 quilómetros do noso municipio”, lamenta.
“De feito, aínda que o PAC de Noia é o máis achegado aos núcleos, hai unha boa parte da nosa veciñanza que xa estaba acudindo ao de Ribeira ao ter algunha emerxencia”, sinala Romero, engadindo que “isto non é outra cousa que un castigo á veciñanza do Barbanza, e en particular á do Porto do Son, que é unha das máis prexudicadas pola medida da Xunta”, lamenta o socialista.
Indica así mesmo que o cambio “será moi negativo tamén para o persoal sanitario, que non só se verá máis desbordado, se non que terá que desprazarse a unha maior distancia para os casos nos que teña que atender a domicilio”.
“Agardamos que a Consellería de Sanidade escoite á veciñanza a través de iniciativas como esta recollida de firmas, nós seguiremos loitando para recuperar e mellorar a atención sanitaria no municipio e na bisbarra”, conclúe Romero.
