O Hospital da Barbanza deu un paso na mellora da atención coa incorporación dun novo profesional de farmacia que, en palabras da Consellería de Sanidade, “permite potenciar a dispensación hospitalaria de medicamentos evitando que os pacientes do distrito teñan que desprazarse máis de 60 quilómetros ata os hospitais de referencia en Santiago”.
Sanidade engade que “os medicamentos de dispensación hospitalaria son tratamentos que, pola súa complexidade ou risco potencial, requiren control médico e farmacéutico hospitalario, polo tanto, a súa dispensación realízase exclusivamente nos servizos de farmacia dos hospitais”.
Así pois con esta incorporación e con outras melloras recentes, máis de 300 pacientes barbanzáns benefícianse xa directamente deste servizo no propio hospital de Ribeira.
“Trátase dun avance clave en accesibilidade e humanización xa que o centro asume a atención farmacéutica de enfermidades autoinmunes como a de Crohn, patoloxías neurolóxicas como a esclerose múltiple, enfermidades infecciosas como os antirretrovirais ou doenzas raras como a fibrose quística”, explica Sanidade, engadindo que “achegar a dispensación hospitalaria ao centro sanitario situado en Ribeira mellora de forma directa a calidade de vida dos pacientes ao evitar desprazamentos longos, reduce custos ao tempo que garante manter o seguimento farmacéutico especializado e máis próximo”.
Esta ampliación na carteira de servizos do hospital barbanzá busca “a comodidade e reforza a seguridade clínica”.
Dende a Xunta valoran que entre as súas principais vantaxes destaca “a maior accesibilidade para pacientes crónicos ou con mobilidade reducida, así como o aforro económico e o menor impacto ambiental ao diminuír os traxectos por estrada”.
O seguimento farmacoterapéutico máis próximo asegura que o paciente mellore a adherencia ao tratamento mentres se optimizan os recursos.
