Este xoves 16 de abril a comarca do Barbanza será a gran protagonista da quinta edición de O Gran Camiño, cunha etapa que unirá Carballo con Padrón. Os ciclistas da proba profesional galega atravesarán os concellos de Outes, Noia, O Porto do Son, Ribeira, A Pobra do Caramiñal, Boiro e Rianxo antes de continuar cara a Padrón, nun percorrido total (hoxe) de 173 km e 2.453 m de desnivel.
En concreto, os deportistas partirán dende Carballo e pasarán por Santa Comba e Outes, antes de achegarse á fachada atlántica por Noia, Porto do Son, Ribeira, A Pobra do Caramiñal, Boiro e Rianxo, desde onde seguirán cara a Rois para concluír en Padrón. Ao seu paso, subirán os portos de Campelo (3ª), A Muralla (2ª) e Formarís (3ª).
A quinta edición de O Gran Camiño desenvólvese entre o 14 e o 18 de abril, con saída na Torre de Hércules e un final espectacular no alto do Monte Trega.
A terceira etapa (a do Barbanza) une dúas localidades que “levan o ciclismo no ADN”, tal e como comentou os días pasados o responsábel de Deportes da Deputación da Coruña, Antonio Leira, que prometeu unha saída desde Carballo decisiva e un final en Padrón “con últimos quilómetros moi interesantes” e que “poden dar moito xogo”.
Desde aí, o pelotón desprazarase a Ourense, etapa raíña, cunha intensa xornada de montaña entre Xinzo de Limia e Xunqueira de Espadanedo, que o vicepresidente da Deputación de Ourense, César Fernández, definiu como “épica” para “amosar a fermosura das paisaxes” da provincia.
Para concluír, a meta deste ano será para Pontevedra, a “provincia do deporte”, como a definiu a responsábel de Deportes da Deputación, Xisela Aranda, quen recoñeceu que toda a provincia é “un estadio natural”. A quinta etapa, desde As Neves, manterá a emoción ata o último minuto no alto do Monte Trega.
