O Concello de Noia vén de dar por rematadas as obras de instalación de saneamento separativo, pavimentación e dotación de subministración de auga para consumo doméstico no núcleo da Albariza, unha actuación que se desenvolveu ao longo dos dous últimos meses.
O concelleiro de Obras, Manolo Seijas, destacou a relevancia desta intervención, subliñando que “se trata da primeira obra executada con medios propios municipais nos últimos dez anos”. Neste sentido, explicou que esta fórmula “permitiu un aforro aproximado de 30.000 euros para as arcas municipais”.
Seijas quixo tamén amosar o seu agradecemento a todo o persoal implicado na execución dos traballos, recoñecendo o seu esforzo e compromiso para levar a cabo a actuación en tempo e forma.
Así mesmo, o edil lembrou que “a ampliación da rede de saneamento separativo é un compromiso que adquirimos ca veciñanza. O reto é continuar desenvolvéndoa a pesar da difícil situación económica que herdamos”.
“Ningunha parroquia é pequena cando se fala dos servizos básicos”, engadiu o tenente de alcalde.
