O Concello de Noia continúa cos traballos de limpeza destinados a acondicionar rúas e infraestruturas e a incrementar a seguridade para viandantes e vehículos.
Durante os días pasados, os traballos concentráronse principalmente na zona de Argalo, onde se levaron a cabo diversas actuacións para mellorar o estado dos espazos públicos.
Entre as intervencións realizadas destacan a limpeza e o adecentamento de camiños, a posta punto do lavadoiro e dos entornos das marquesiñas e, tamén, a limpeza integral dos empedrados.
Así mesmo, tamén se estivo traballando no entorno da Chaínza, continuando coa posta a punto doutras zonas do municipio.
Unha vez rematadas as actuacións en Argalo, está previsto iniciar novos traballos nas zonas de Boa e Santa Cristina, que inclúen o paso dos tractores municipais e da nova varredora de rúa, segundo informou o Concello, que quixo agradecer o esforzo do persoal municipal, e pedir desculpas “polas posíbeis molestias ocasionadas durante o desenvolvemento destes traballos, que continuarán por todas as parroquias do municipio”.
