O Concello de Muros, coa colaboración do Concello de Carnota, organizará un novo obradoiro dual de emprego para 20 persoas denominado Oe Monte Feixa.
Trátase dun programa mixto de emprego e formación que pretende mellorar a empregabilidade das persoas participantes, que recibirán formación e desenvolverán tarefas profesionais remuneradas, ademais de obter unha cualificación profesional que lles permitirá optar a postos de traballo.
En Muros, concello promotor do obradoiro, impartiranse dous módulos cunha duración de nove meses: Aproveitamentos forestais e xestión da biomasa forestal e Actividades auxiliares en conservación e mellora de montes.
“Os concellos non temos competencias directas en materia de emprego, pero debemos organizar e xestionar actividades de formación que impulsen a inserción laboral da nosa veciñanza”, explica a alcaldesa de Muros, María Lago, “polo que é unha satisfacción que nos concederan o obradoiro despois de presentar e xestionar a nosa solicitude”.
Este obradoiro dual de emprego está co-financiado polo Goberno do Estado e pola Xunta de Galicia.
A data do inicio da formación e as prácticas profesionais será o 1 de xuño de 2026. Abrirase un prazo de presentación de solicitudes para participar no obradoiro do que se informará desde o concello.
