O Bus do Teatro do Centro Dramático Galego, o CDG, pasará esta fin de semana polo Barbanza para levar á veciñanza dos concellos a Santiago (no Salón Teatro) e asistir á representación da nova versión de Hamlet, de William Shakespeare, da man do CDG.
O bus pasará por Ribeira o venres 10 de abril, con saída dende a Estación de Autobuses ás 15.45 horas.
Ademais, o bus tamén pasará por Rianxo e Boiro o domingo 12 de abril con hora de saída ás 15.30 horas dende o parque da Cachada (Boiro) e ás 15.45 dende o Auditorio de Rianxo e con volta ás 20.15 horas (o inicio da función está previsto ás 18.00 horas).
O Centro Dramático Galego presenta Hamlet cunha produción propia de gran formato dirixida por Tito Asorey, quen asina xunto a Vanesa Sotelo a versión galega do clásico de Shakespeare cun elenco de 16 actores e actrices sobre as táboas.
Publicada en 1603, a traxedia do príncipe de Dinamarca —marcada pola vinganza, a traizón e o remorso— preséntase aquí situada na contemporaneidade, 20 anos despois da súa última montaxe en galego. Hamlet enfróntase á morte do pai, á precipitada voda da nai co seu tío e á revelación da pantasma que lle esixe vinganza. Mais o maior conflito non será externo, senón interior: a súa conciencia, que o paraliza nun mundo moralmente corrompido.
O novo espectáculo dialoga cos dilemas da sociedade actual, interpelándonos como habitantes da era das intelixencias artificiais, para reivindicar a necesidade de recuperar a humanidade.
“Este Hamlet non é só unha obra de teatro, é un acontecemento cultural”, afirma Asorey, quen salienta a dimensión colectiva dun proceso creativo que devolve vida e presente ás palabras do bardo inglés desde os nosos días.
Dramaturxia: Vanesa Sotelo e Tito Asorey
Dirección: Tito Asorey
Ficha artística
Texto orixinal: William Shakespeare
Dramaturxia: Vanesa Sotelo e Tito Asorey
Dirección: Tito Asorey
Elenco: Sergio Abelaira, Cristina Andrade, Belén Constenla, Raquel Espada, Isabel Garrido, César Goldi, Alejandro Jato, Marita Martínez, Iolanda Muíños, Anxo Outumuro, Pedro Placer, Adrián Ríos, Machi Salgado, Toni Salgado, Inés Salvado Gontad, Sergio Zearreta
Escenografía: Carlos Alonso
Iluminación: Laura Iturralde
Vestiario: Saturna
Espazo sonoro: Xavier Bértolo
Maquillaxe e caracterización: Lorena Calvo
Movemento escénico e coreografía: Rut Balbís
Loita escénica: Xosé Piñeiro
Asistencia de texto: Melania Cruz
Asesoramento lingüístico: Rosa Moledo
Axudante de dirección: Sara Rey
