A deputada do BNG no Parlamento galego, a pobrense Rosana Pérez, esixiu este martes 7 de abril á Xunta “establecer un marco de negociación coa Mancomunidade Serra do Barbanza e cos Concellos que forman parte desta institución para desenvolver conxuntamente un plan de aproveitamento das potencialidades da planta de Servia, no municipio de Lousame, na xestión sostíbel de residuos”.
Así o fixo desde a propia planta de Servia, onde a representante nacionalista solidarizouse “coa complicada situación que atravesa o cadro de persoal, especialmente o da triaxe, cuxo cadro de persoal componse maioritariamente por mulleres e que, unha vez máis, paga as consecuencias do abandono do Goberno galego, neste caso a todo modelo de reciclaxe que non sexa SOGAMA”, dixo, engadindo que “a planta de Servia chegou á súa situación actual pola nefasta xestión de gobernos do PP e do PSOE indistinguíbeis na práctica”. A parlamentaria engadiu que, a día de hoxe, a Mancomunidade e a Xunta queren impoñer a idea de que “pechar a planta é a única opción”. Pérez lembrou o “consenso” existente entre alcaldías de diferente cor, así como do cadro de persoal, sobre a necesidade de manter a actividade na planta de Servia, “un activo moi importante a preservar, un complexo viábel e con posibilidades, mais isto só é posíbel no caso de que haxa vontade por parte das administracións e, nomeadamente, da Xunta da Galiza, que até o de agora está facendo o que xa fixo durante as últimas décadas, que é dar as costas a todo o que non sexa SOGAMA”, engadiu.
Laiouse de que a Xunta non considere Servia “un activo para este país, colaborando na modernización da planta para descentralizar a xestión dos residuos, aproveitando o capital humano e aceptando o rexeite resultante do tratamento en Cerceda”. Tamén se lamentou de que o Goberno galeo forzase á Mancomunidade Serra do Barbanza a abandonar a planta de Lousame a través dunha chantaxe, sen importar as decenas de familias que dependen dos postos de traballo e sen importar a existencia dun complexo con licencias que podería ser a primeira pedra dun novo modelo de xestión dos residuos no país”, aseverou a deputada.
“Mais aínda estamos en tempo de que esta opción escollida sexa mudada por unha máis responsábel. Lousame podería ser un primeiro paso de cara a un sistema de xestión de residuos centrado na redución e a compostaxe de materia orgánica como contraposición a un modelo de SOGAMA, que incinera a metade dos residuos e non chega a recuperar unha décima parte a través da reciclaxe”, concluíu a representante do BNG.
Pola súa parte, o representante do BNG na Xunta Reitora da Mancomunidade Serra do Barbanza, Ricardo Suárez, apostou por “un novo modelo baseado na redución de residuos en orixe, a recollida selectiva, a reutilización, a reciclaxe e a compostaxe a través de plantas achegadas ao territorio e que xeren emprego. É a aposta que precisa este país para ser máis eficientes, para crear emprego sostíbel e para cumprir as nosas responsabilidades medioambientais, e isto é o que se podería (e aínda se pode) ter feito a través da colaboración entre o Goberno galego e Mancomunidade en Lousame”, destacou o tamén portavoz nacionalista en Noia, engadindo que “hai consenso social para isto, hai unha planta viable que foi abandonada e hai decenas de postos de traballo en risco. Refrotar a planta de Servia, en Lousame, require de cooperación entre institucións, e require tamén dun plan para facelo”, sinalou.
