O Auditorio do Centro Cultural e Xuvenil de Muros acolle unha nova fin de semana de cine coa proxección de dúas propostas para diferentes públicos: Cumbres borrascosas e Super Mario Galaxy: La Película.
Por unha banda, proxectarase Cumbres borrascosas, a nova adaptación cinematográfica do clásico da literatura de Emily Brontë, dirixida por Emerald Fennell. A película ofrece unha intensa historia de amor e vinganza ambientada nos páramos ingleses, centrada na relación entre Heathcliff e Catherine, marcada polas paixóns extremas e os conflitos sociais.
As sesións terán lugar no auditorio o venres 17 e o sábado 18 de abril ás 20.30 horas, así como o domingo 19 de abril ás 19.00 horas.
Por outra banda, o público familiar poderá gozar de Super Mario Galaxy: La Película, unha nova aventura de animación protagonizada por Mario, Luigi e a princesa Peach, que nesta ocasión viaxan a través da galaxia para enfrontarse a novos desafíos nunha historia chea de acción, humor e entretemento.
Esta longametraxe familiar proxectarase o sábado 18 de abril ás 18.00 horas e o domingo 19 de abril ás 17.00 horas.
A concelleira de Cultura do Concello de Muros, Caridad González, destaca a importancia de ofrecer unha programación variada: “Seguimos apostando por unha oferta cinematográfica diversa, que combina grandes clásicos reinterpretados co cine familiar máis actual, para chegar a todos os públicos e manter unha programación estable durante todo o ano”.
As entradas están dispoñíbeis na billeteira electrónica do Concello de Muros e nas oficinas do Centro Cultural e Xuvenil de Muros.
