A Libraría Social ULA (Outes, rúa da Capela) acolle este mes de abril, en dúas quendas e en horario de tarde, un obradoiro de escritura arredor dos nosos hórreos co arquitecto e artista Jacques Ligot, un dos principais investigadores actuais das ditas arquitecturas típicas da nosa terra, recentemente declaradas como Patrimonio Cultural Inmaterial por parte do Goberno de España.
Os obradoiros previstos na ULA forman parte (precisamente) das súas investigacións, e a idea é convidar ás persoas participantes a participar nelas coas súas contribucións.
Desenvolveranse baixo o epígrafe Unha pequena investigación nas nosas lembranzas: os hórreos. A primeira quenda será o xoves 23 de abril en horario de 18.30 a 20.30 horas e o xoves 30 de abril no mesmo horario.
Arquitecto e investigador, Jacques-Marie Ligot examina a arquitectura a través do estudo dos xestos, prestando especial atención ao patrimonio vernáculo e inmaterial. Arquitecto formado en construción en madeira na École Nationale Supérieure deas Techniques et Industries du Bois (Épinal) e en Ensa Paris Val de Seine, desenvolve unha práctica híbrida que combina a produción artística, o ensino, a investigación e a produción arquitectónica. Traballa en proxectos a longo prazo con grupos de residentes, en particular no sitio da Courouze en Rennes (2019-2024) e no Parque Natural de Aubrac (desde 2016), e colabora regularmente con artistas, bailaríns e artesáns. O seu traballo de investigación céntrase en tres áreas: a narrativa íntima e colectiva como ferramenta de deseño, a danza e o invisible como estruturas espaciais e políticas, e o xesto performativo para crear unha arquitectura da atención.
Respecto do seu proxecto centrado nos hórreos galegos, busca interrogar a súa transformación simbólica e material nun territorio marcado polas mutacións agrícolas e climáticas.
Inspirado tanto polos relatos animistas como polas danzas tradicionais e as arquitecturas vernáculas, o artista explora estas formas como corpos arquitectónicos portadores de memoria, de xestos e de crenzas.
Jacques-Marie Ligot convoca tamén a súa propia memoria corporal para achegar os hórreos ás procesións españolas.
A partir dunha documentación de campo (visitas, entrevistas con artesáns, arquivos), busca comprender a evolución destas estruturas, outrora no centro dos sistemas agrícolas, e propoñer sobre elas un cuestionamento contemporáneo.
