O Concello de Boiro celebra esta semana unha nova actividade de participación veciñal: un novo encontro coa veciñanza dos núcleos baixo o epígrafe Un café co alcalde e destinado a atender as demandas e necesidades da xente das parroquias.
A cita será este mércores 22 de abril ás 20.00 horas, na Casa dos Veciños de Cespón.
Está previsto que se fagan dúas xuntanzas por mes para poder visitar todas as parroquias antes do verán. A finalidade destas xuntanzas, que xa se realizaron con anterioridade, é “que os veciños e veciñas de cada parroquia poidan poñer de manifesto as necesidades conxuntas de cada núcleo”, segundo confirmou o Concello, engadindo que con “estes encontros búscase ter un contacto máis directo coa cidadanía e dar a oportunidade aos veciños e veciñas de que trasladen as súas peticións e demandas sen necesidade de ter que desprazarse ao Consistorio”.
Estas xuntanzas pretenden servir como complemento das xuntanzas veciñais que o alcalde e demais concelleiros e concelleiras manteñen semanalmente de xeito individual.
