O IES Félix Muriel converterase unha vez máis en epicentro da creatividade coa celebración da entrega de premios do III Certame Artístico “Cousas” o vindeiro 24 de abril. Trátase dunha iniciativa que busca dar visibilidade ao talento artístico do alumnado e fomentar a expresión a través da imaxe e a palabra en galego, ao mesmo tempo que persegue rememorar a relevancia de Castelao e o seu legado.
O xurado, composto por profesionais como Pilar Ponte e Xabier Vázquez Parcero, vinculados ao ámbito educativo; Kiko da Silva, profesional das artes plásticas; e Leo Arremecághona, artista polifacético, poeta e docente, escolleu as obras gañadoras de entre 30 finalistas, previamente seleccionadas polo grupo Ekos, responsábel do certame, a partir das 76 creacións artísticas enviadas.
O 1º premio, dotado con 300 euros e diploma, foi para Carolina Ferreira Vázquez, alumna de 18 anos do IES Felix Muriel, pola súa obra A cadeira baleira.
O 2º premio, de 200 euros, recaeu en Ezechiel Gonzaléz Rodríguez de 15 anos, do CPR Plurilingüe Sagrada Familia, de Vilagarcía de Arousa, pola súa obra O recendo de xabón lagarto.
E o 3º premio, con 100 euros, foi para Violeta Trillo Maschi, de 15 anos, do IES Xelmírez II, pola súa creación Corazón brillante.
Ademais, outorgáronse dous accésits con diploma a Valeria Varela, alumna de 17 anos, do IES Felix Muriel, de Rianxo, por As mans que sosteñen o mundo, e a Lara Barreiro, alumna de 13 anos, do IES Felix Muriel, de Rianxo, por Votar, polo seu gran labor creativo.
O grupo de traballo Ekos, responsable da convocatoria e organización destes premios, traslada á comunidade educativa o convite ao acto de entrega dos premios, que se celebrará a partir das 12:00 horas na biblioteca do instituto rianxeiro e converterá o centro nun espazo de encontro para a creatividade e a celebración cun programa que comezará ás 12:00 horas coa recepción do alumnado premiado e dos membros do xurado, seguida ás 12:10 do canto de Grândola, de Zeca Afonso, no patio do instituto.
Ás 12:30 dará inicio o acto coa interpretación do himno galego a cargo do alumnado de 4º da ESO, acompañado pola docente Dolores Bretal, e continuará ás 12:35 coa intervención do director, Ramón Veiga, xunto coas palabras dos membros do xurado, Xabier Vázquez, Leo Arremecaghoná e Kiko da Silva.
Ás 12:50 celebrarase a interpretación de Lela por Mariña Romero, alumna de 2º de Bacharelato, e ás 12:55 procederase á lectura dos textos gañadores por parte das súas autoras e autor. O acto concluirá ás 13:20 coa despedida e a interpretación da Rianxeira polo alumnado de 4o da ESO, para dar paso, ás 13:30, a unha celebración na sala do Equipo de Normalización e Dinamización da Lingua Galega; un acto que terá lugar xusto antes da foliada que dará por finalizada a Semana do Libro no centro.
