Os concellos de Noia, Outes e Lousame impulsarán conxuntamente o obradoiro dual de emprego Noia-Outes-Lousame 2026, trala concesión dunha subvención da Xunta de Galicia que ascende a 522.052 euros, destinada á formación e contratación de 20 alumnos-traballadores durante un período de 9 meses.
O proxecto, promovido de maneira coordinada entre os tres municipios e canalizado administrativamente a través do Concello de Noia, permitirá desenvolver actuacións vinculadas ao ámbito forestal e á mellora ambiental en distintos espazos municipais dos tres territorios.
O alcalde de Noia, Francisco Pérez, destacou que “este obradoiro supón unha oportunidade clave para mellorar a empregabilidade da veciñanza e avanzar na conservación do noso entorno natural”. Pola súa banda, o tenente de alcalde, Manolo Seijas, subliñou “a importancia da colaboración entre concellos para acadar recursos e poñer en marcha iniciativas que repercuten directamente na cidadanía”.
Desde o Concello de Outes, o alcalde Fran Calo puxo en valor “a cooperación institucional como ferramenta fundamental para atraer investimentos e xerar oportunidades laborais no rural”.
No mesmo sentido, o alcalde de Lousame, Esteban Ares, destacou que “este tipo de programas permiten combinar formación e emprego, ao tempo que se realizan melloras necesarias no territorio”.
O obradoiro inclúe especialidades formativas relacionadas coas actividades auxiliares en aproveitamentos forestais e conservación de montes, e desenvolverase en diferentes espazos dos tres concellos, contribuíndo á mellora ambiental e á prevención de riscos naturais.
As persoas interesadas en participar deberán estar empadroadas en Noia, Outes ou Lousame e é requisito imprescindible inscribirse como demandantes de emprego no Servizo Público de Emprego Estatal (SEPE) e incluír interese na formación que se oferta para poder optar a unha das prazas do programa.
Desde os tres concellos anímase á veciñanza a informarse e participar neste obradoiro, que combina formación teórica, práctica profesional e contratación laboral, constituíndo unha oportunidade real de inserción no mercado de traballo.
