O Auditorio do Centro Cultural e Xuvenil de Muros acolle mañá venres 24 de abril ás 20.30 horas a proxección de Basal, un documental dirixido por Ugia Pedreira, que contará cun coloquio posterior coa propia artista.
A actividade enmárcase na programación cultural da Deputación da Coruña, que achega esta proposta a Muros co obxectivo de promover iniciativas culturais accesibles e de calidade.
Basal é un docudisco que retrata a vida da cantautora galega Ugia Pedreira xunto á súa filla, explorando a súa relación coa música e coa diversidade funcional. A través dun percorrido íntimo entre Galicia, Euskadi e Nova York, o filme mestura memoria, creación e emoción, reivindicando a cultura como un dereito universal.
A proposta combina imaxe e son nun formato singular que convida ao espectador a mergullarse nunha experiencia sensorial e reflexiva, marcada pola tenrura e pola forza das historias que recolle.
Ao remate da proxección, o público poderá participar nun coloquio coa propia Ugia Pedreira, unha oportunidade para coñecer de primeira man o proceso creativo do documental e afondar nos temas que aborda.
A concelleira de Cultura do Concello de Muros, Caridad González, destacou a importancia de acoller este tipo de propostas: “Seguimos apostando por unha programación que combina diferentes formatos e linguaxes artísticas. Actividades como esta permítennos achegar ao público obras comprometidas e abrir espazos de diálogo arredor da cultura”.
A entrada será gratuíta, sendo necesaria a reserva previa na billeteira electrónica do Concello de Muros ou nas oficinas do Centro Cultural e Xuvenil.
