Todo preparado en Muros para a décima edición do Dúatlon Eleuterio Balayo, que se celebrará este sábado, día 18 de abril, con máis de 250 participantes.
A proba, xa consolidada no calendario deportivo galego, será un ano máis o escenario do Campionato Xunta de Galicia Supersprint nas categorías cadete, xuvenil e júnior. Ademais, haberá unha proba popular na modalidade Sprint.
“Unha proba que cada ano ten mellor acollida e que serve como recoñecemento ao noso veciño Eleuterio Balayo, un gran apoio para o deporte de Muros”, subliñou a alcaldesa María Lago na presentación.
Pola súa parte, o concelleiro de Deportes, Damián Torea, convidou á veciñanza “a disfrutar da espectacularidade das probas, desde a zona do recheo ata a antiga Fábrica de Sel no sector a pé, e na estrada de Muros a Louro para a proba ciclista”.
Os horarios das probas serán ás 14:45 e ás 17:00 horas. Participaron tamén na presentación do Dúatlon as concelleiras Sandra Maneiro e Laura Rivadeneira, e Quico Lestón, técnico de Deportes.
Unha proba organizada polo Concello de Muros e a Federación Galega de Tríatlon e Péntatlon Moderno (FEGATRI), coa colaboración da Policía Local de Muros; Protección Civil de Muros; Garda Civil Muros; Brigada de Obras; GES Muros; persoal da área de Deportes e clubs locais; Secretaría Xeral para o Deporte, e a Universidade de Santiago de Compostela.
