Este sábado 2 de maio vaise celebrar en Boiro un dos grandes acontecementos comerciais, sociais e culturais da tempada no Barbanza: a edición 2026 do Maio Vintage Market, na rúa peonil de Boiro.
O Concello de Boiro organiza o vindeiro sábado 2 de maio unha nova edición do Maio Vintage Market, xunto coa colaboración da Asociación Boirense de Empresas (ABE) e o grupo de voluntariado Turbina.
Segundo explican as entidades organizadoras, trátase da primeira gran festa da primavera que serve como dinamizador cultural e da hostalaría e que supón o inicio dos eventos ao aire libre. Estamos pois, sinalaron, ante “unha adaptación da festa dos maios que, noutra época, significaba o cambio de estación, a chegada do bo tempo e o rexurdir da terra”.
Como en cada edición, o Maio Vintage Market implica ás asociacións culturais, colectivos, hostalaría, comercio… que amosan o gran dinamismo de Boiro. Ademais, haberá artista como Peter Punk, Jara Ortiz, Coro Cores, DJ Esteban ou DJ Toño Ferreirós. Tamén participan no Maio Vintage Market colectivos e asociacións como Ambar ou Turbina.
A programación divídese en varios escenarios e esténdese ao longo da rúa Peonil con actividades para todos os públicos, que se mestura coa programación que levan a cabo directamente outros espazos e establecementos locais.
A concelleira de cultura, María Outeiral, animou á veciñanza a participar nesta actividade “unha das festas máis atractivas que celebramos no noso concello e que se foi consolidando co paso dos anos e que conta coa colaboración de colectivos e asociacións”.
