A Consellería de Medio Ambiente e Cambio Climático, a través de Augas de Galicia, contribuíu a eliminar recentemente un vertido de augas residuais de carácter municipal na parroquia de Taragoña, no concello coruñés de Rianxo. O episodio foi detectado polo persoal do Programa de Control de Vertidos (PCV) do organismo hidráulico autonómico no marco dos labores rutineiros de inspección que realiza nos concellos da Demarcación Hidrográfica Galicia-Costa. Segundo informou Augas de Galicia, “a incidencia consistía nun vertido de augas residuais urbanas sen depuración previa consecuencia dunha deficiencia na conexión á rede de saneamento municipal”.
O vertido era efectuado directamente sobre o terreo, onde remataba por infiltrarse.
Unha vez detectadas as deficiencias, os técnicos de Augas de Galicia informaron da situación ao Concello de Rianxo para que, como titular da rede e competente da súa xestión, adoptara as medidas oportunas co fin de eliminar o foco contaminante.
Nunha inspección posterior á zona, persoal do PCV comprobou que o Goberno local executara traballos para solucionar a deficiencia, de forma que todas as augas residuais acadan xa a rede de saneamento para recibir o tratamento correspondente e púxose fin aos aportes irregulares ao dominio público hidráulico.
