As rapazas do Club Noia Patín proclamáronse campioas do Trofeo Ciudad de Alcoy de Grupos Grandes, celebrada en Alcoy, grazas á estudada e traballada coreografía que acompañou o tema Sin identidad.
O Concello de Noia deu os parabéns ás deportistas e sinalou que “proclamarse campioas desta competición é un logro extraordinario, resultado de moitos anos de traballo, esforzo e paixón sobre a pista”. O alcalde Francisco Pérez sinalou que “é unha vitoria máis que merecida que recoñece todo o esforzo, talento e dedicación das integrantes do equipo”.
O triunfo vai máis alá dun simple recoñecemento ao seu nivel deportivo xa que lles dá o pase para a World Cup que terá lugar o 31 de maio en Cesena, Italia.
A nova edición dos Campionatos de España de Shows e Cuartetos Júnior e a 10ª edición do Trofeo Ciudad de Alcoy de Shows Grandes e Pequenos celebrouse esta fin de semana (venres e sábado) no Polideportivo Municipal Francisco Laporta Pabellón Mútua Levante de Alcoy (Alacante), ao que acudiron os mellores grupos e cuartetos júnior da xeografía estatal e algúns dos mellores grupos grandes e pequenos de España.
Un total de 20 Grupos Show Júnior e 20 Cuartetos Júnior participaron no Campionato de España e un total de 13 Grupos Grandes e 23 Grupos Pequenos disputarán o X Trofeo Ciudad de Alcoy, todos eles procedentes de trece federacións autónomas diferentes.
