As obras de acondicionamento da AG-11 Autovía do Barbanza xa son visibles sobre o terreo. Este venres pola mañá puidéronse ver máquinas e operarios traballando no inicio do vial, na contorna de Padrón, onde comezaron as primeiras actuacións.
Desde a Consellería de Vivenda e Planificación de Infraestruturas confirmaron que nesta fase inicial estanse executando traballos de fresado, unha operación previa ao acondicionamento posterior da capa de rodadura. Como consecuencia destes labores, os condutores que circularon pola zona atopáronse co carril dereito en dirección a Ribeira cortado nos primeiros tres quilómetros.
O proxecto foi autorizado polo Consello da Xunta de Galicia en xuño do pasado ano, cun investimento próximo aos 12 millóns de euros. Posteriormente, o contrato foi adxudicado a mediados de outubro de 2025 e formalizado o 21 de novembro, mentres que o 17 de decembro aprobouse o plan de seguridade e saúde.
Aínda que nun primeiro momento prevíase o inicio das obras no primeiro trimestre de 2026, finalmente ese calendario non se cumpriu e os traballos arrincaron con atraso.
A intervención prevista abrangue máis de 40 quilómetros da autovía e inclúe, ademais do reasfaltado, a revisión da sinalización horizontal, a substitución de elementos deteriorados, a instalación de novos sistemas de balizamento e a renovación de xuntas de dilatación nas estruturas do tronco da vía.
O contrato contempla tamén dúas actuacións complementarias orientadas a reforzar a seguridade viaria.
