Teatro Airiños vai celebrar este sábado 2 de maio un Tribial Cabareteiro, a partir das 20.30 horas. Será un animado e distendido concurso de preguntas e respostas (45 preguntas) por equipos (10) que dará comezo ás 20.30 horas.
A proposta ten tres piares básicos: premios, actuacións e taberna.
A entrada será libre pero cómpre formalizar a inscrición previamente para participar no concurso, a través da conta contacto@teatroairinhos.gal. Serán benvidas (especialmente) aquelas e aqueles concursantes que acudan ao concurso cun outfit cabareteiro para a ocasión.
Haberá premios das editoriais Cazapitos e Rinoceronte. Tamén haberá cantina (a cantina da asociación local Leoria). O Tribial Cabareteiro vén da man do histórico grupo teatral Airiños en colaboración co Concello de Rianxo e máis a Deputación da Coruña.
A cita encádrase nas Veladas de Primavera 2026 de Airiños nas Escolas Vellas da Atalaia de Asados.
