A conselleira de Política Social e Igualdade, Fabiola García, visitou esta mañá as instalacións onde se construirá a futura residencia para persoas con discapacidade de Outes, un proxecto no que a Xunta de Galicia inviste 2 millóns de euros e que será xestionado pola Asociación de Discapacitados da Bisbarra de Muros (Adisbismur).
No acto participaron tamén o alcalde de Outes, Francisco Calo; o presidente de Adisbismur e do CERMI Galicia, Ramón Sestayo; e o presidente de Cogami, Anxo Queiruga.
Durante a súa intervención, a conselleira destacou que este investimento “reflicte o compromiso da Xunta coa atención ás persoas con discapacidade” e permitirá transformar o antigo colexio do Cruceiro de Roo, cedido polo Concello, nun centro residencial con capacidade para 24 persoas. Así mesmo, puxo en valor a traxectoria de Adisbismur, entidade con máis de 40 anos de experiencia no ámbito da atención social.
Fabiola García subliñou que este novo recurso de proximidade facilitará que os usuarios “poidan vivir preto dos seus fogares, na súa contorna”, dando resposta ás necesidades das familias da zona. A futura residencia contará con prazas distribuídas entre habitacións e pequenos apartamentos, favorecendo a autonomía persoal, a inclusión social e a creación de emprego.
A conselleira agradeceu a colaboración do Concello de Outes e de Adisbismur, e enmarcou esta actuación na estratexia do Goberno galego para reforzar a rede de atención á discapacidade. Neste sentido, lembrou que a Xunta leva investidos máis de 30 millóns de euros nos últimos anos en melloras e novos recursos para entidades sociais en toda Galicia.
Servizos de proximidade no rural
A nova residencia situarase no edificio da antiga escola do Cruceiro de Roo, que conta con tres plantas e foi cedido gratuitamente polo Concello para a súa adaptación. O proxecto global alcanza un investimento de 2,3 millóns de euros, sendo a entidade encargada da redacción do proxecto definitivo, da contratación e do seguimento das obras.
Este novo recurso completarase coa actual rede de servizos de Adisbismur, que xa inclúe un centro ocupacional con capacidade para arredor de 50 usuarios e un centro de día para unha vintena de persoas. Nestes dispositivos, a Xunta financia 49 prazas cun investimento anual próximo aos 720.000 euros.
Con esta iniciativa, a Administración autonómica reafirma a súa aposta polos servizos de proximidade no rural, facilitando que as persoas con discapacidade poidan permanecer na súa contorna habitual e mellorar a súa calidade de vida.
