Na tarde deste martes 28 de abril a Policía Local de Ribeira deu inicio a unha campaña de control dos Vehículos de Mobilidade Persoal (VMP) destinada a verificar os permisos dos aparellos que circulan polo municipio.
Os axentes lembran aos propietarios destes vehículos que deben cumprir cos seguintes requisitos administrativos: a alta no Rexistro de Vehículos da DXT, portar a etiqueta identificativa (matrícula) e contar co seguro obrigatorio.
Sinalan ás persoas que mercaron un VMP (tipo patinete eléctrico ou similar) antes de 2024 e que polo tanto careza da chapa de marcaxe troquelada do fabricante, deben igualmente cumprir os devanditos requisitos e poderán seguir circulando ata o 22 de xaneiro do ano que vén.
Cómpre polo tanto que regularicemos o noso patinete eléctrico, sinalan, engadindo que “se somos menores de idade debemos solicitar a axuda dos nosos titores legais, xa que incumprir estes requisitos implica sancións dende os 80 aos 800 euros xunto coa inmobilización e retirada do vehículo”.
As persoas que teñan dúbidas sobre a normativa poden acudir á Xefatura da Policía Local para recadar máis información.
