O Concello da Pobra do Caramiñal volve apostar, un ano máis, por unha ampla e diversa programación cultural para o mes de maio, coincidindo coa conmemoración das Letras Galegas. Música, danza, literatura, exposicións completan un amplo abano de actividades pensadas para todos os públicos.
A concelleira de Cultura, Patricia Lojo, destacou na presentación da axenda o papel fundamental do tecido asociativo para facer posíbel esta programación: “Maio vén cargado de actividade cultural grazas ás asociacións que colaboran sempre con nós. Queremos agradecerlle a súa implicación por enriquecer deste xeito o noso concello”.
Do mesmo xeito, convidou á veciñanza a participar activamente: “Animamos a todos os veciños e veciñas a que veñan e desfruten das propostas. As Letras Galegas son unha data moi importante e contamos cun abano moi amplo de actividades para celebralas”.
O programa dará comezo o sábado 2 de maio cunha ruada polas prazas e remate nos xardíns de Valle-Inclán da man da asociación Arrancadeira, que ofrecerá o seu espectáculo Bailando ás flores (Festa dos Maios).
Ao día seguinte, o domingo 3 de maio, haberá un festival polo Día da Nai coa Escola de Baile Caramiñas da asociación de Amas de Casa da Pobra. Será ás 20.00 horas no Teatro Elma.
O 8 de maio celebrarase a inauguración da exposición de pinturas A espátula e pincel, de Paco Casal. Será ás 20.00 horas na Casa da Cultura Raquel Fernández Soler.
O 9 de maio a música será a protagonista co Consertasso na horta, de Brais das Hortas. Terá lugar no Teatro Elma ás 18.30 horas.
O propio día das Letras Galegas, 17 de maio, haberá un roteiro guiado polas rúas que lembran aos escritores/as galegas acompañado da música do grupo Eiradela. Dará comezo ás 11.30 horas.
O día 21 de maio, ás 20.00 horas, farase un percorrido polos traballos internos do Museo Valle-Inclán por Sara Barbazán.
En homenaxe a Begoña Caamaño, o día 22 de maio, ás 18.30 horas, no Cantón da Leña, terá lugar o obradoiro Polo Correo do Vento: As Letras para Begoña. Será “unha combinación de narración oral, música en directo, ilustración e obradoiro de debuxo”. Esta actividade forma parte da Rede de Dinamización Lingüística.
Daniel Landesa presentará, o día 27 de maio, ás 12.00 horas, no auditorio da Biblioteca Victoriano García Martí, o libro gañador do VIII Premio de Literatura Infantil Carlos Mosteiro, Nenapingüín. O alumnado de primaria recibirá un exemplar como agasallo. Seguindo coas presentacións, o 29 de maio, ás 20.00 horas, Juan Galán presentará Rotspanier. Un miliciano galego no exilio francés (1939-1945).
Por último, a programación despedirase co espectáculo Reunión Familiar, de Bradomín Teatro. Será ás 19.30 horas no Teatro Elma.
