Esta pasada fin de semana, unha representación da Escola de Música e Baile Tradicional do Concello de Outes, acompañada polo alcalde, Francisco Calo Abelleira, tivo a honra de participar no XXII Encontro de Gaitas e Baile Tradicional organizado pola Casa de Galicia en Alcobendas (Comunidade de Madrid).
Un total de 22 alumnos e alumnas das especialidades de gaita, baile e percusión viaxaron ata Madrid para demostrar o gran nivel artístico do concello. Durante as xornadas de sábado e domingo, os mozos e mozas foron verdadeiros embaixadores da cultura tradicional galega. A delegación quixo expresar o seu “máis profundo agradecemento” á Casa de Galicia en Alcobendas “polo exquisito trato recibido”, e tamén á Xunta de Galicia, a través da Dirección Xeral de Emigración, polo “seu apoio e por ter feito posíbel a realización do dito evento”.
Dende o Concello engadiron que “esta viaxe puxo de manifesto a madurez da nosa Escola que, tras tres décadas de traxectoria, conta hoxe con máis de 100 alumnos e alumnas”.
