A Xunta de Galicia e o Concello de Ribeira deron novos pasos no proxecto para a construción dunha residencia pública de maiores no municipio, que podería levantarse nunha parcela de titularidade municipal.
A conselleira de Política Social e Igualdade, Fabiola García, acompañada da secretaria xeral técnica da Consellería, María Francisca Gómez, mantivo unha reunión coa alcaldesa de Ribeira, María Sampedro, para abordar distintas cuestións relativas ao desenvolvemento deste proxecto.
Durante o encontro, a rexedora trasladou á conselleira a proposta de construír o centro residencial nunha parcela municipal que o Concello cedería á Xunta co obxectivo de impulsar a creación desta infraestrutura pública no municipio.
Pola súa banda, Fabiola García comprometeuse a visitar proximamente os terreos para coñecer de primeira man a súa localización e avaliar a idoneidade da parcela para a implantación do centro. Ademais, felicitou á alcaldesa polo seu compromiso coa atención ás persoas maiores e polo impulso aos servizos sociais destinados ás familias da localidade.
A futura residencia pública suporía un reforzo da rede asistencial na comarca e daría resposta a unha demanda histórica de prazas públicas para persoas maiores en Ribeira e na súa contorna.
