As comarcas das Rías Baixas e a área de Santiago de Compostela afrontarán un xoves marcado pola inestabilidade, coa chegada progresiva dunha fronte que traerá consigo aire frío en altura e un cambio significativo no tempo.
Durante a mañá os ceos iranse cubrindo de oeste a leste, e co avance das horas as chuvias iranse estendendo por todo o territorio. Nas Rías Baixas espéranse precipitacións intermitentes que poderán ser localmente treboentas, mentres que en Santiago tamén se agardan episodios de choiva acompañados de aparato eléctrico en momentos puntuais.
A presenza de aire frío favorecerá un descenso xeneralizado das temperaturas, que será moderado en conxunto pero notable nas máximas, deixando unha sensación máis invernal nas horas centrais do día(máximas entre 13 e 15 graos). Ademais, a cota de neve irá baixando progresivamente, situándose arredor dos 1.100 metros na madrugada do venres, o que podería deixar acumulacións nas zonas máis altas do interior galego.
En canto ao vento, soprará de compoñente norte moderado pola mañá, máis frouxo no interior, pero incrementándose pola tarde ata forte no litoral das Rías Baixas e nas zonas altas, onde se deixará sentir con maior intensidade.
O noso mar; Vento do norte á mañá e do norte á tarde e á noite, forza 3 a 5 á mañá e 6 a 8 á tarde e á noite. Forte marusía á mañá e vaga á tarde e á noite. Visibilidade boa á mañá e regular á tarde e á noite. Mar de fondo do noroeste, con ondas de 0.5 a 1.5 metros á mañá, 1.5 a 2.5 metros á tarde e 2 a 3 metros á noite.
