Unha fronte fría deixará este venres un cambio claro de tempo en Galicia, con máis chuvia e ambiente invernal nas últimas horas do día.
Pola mañá as precipitacións chegarán polo oeste e irán estendéndose co paso das horas ao resto da Comunidade, con ceos cubertos e chuvias frecuentes. Cara á noite, a cota de neve baixará ata situarse arredor dos 1000 metros, polo que poderán rexistrarse neveadas nas zonas de montaña.
As temperaturas mínimas manteranse sen cambios salientables, pero as máximas baixarán de maneira moderada, deixando unha xornada máis fría que as anteriores(máximas de 14 a 15 graos). O vento soprará do suroeste a primeira hora, para rolar a noroeste ao final do día; será moderado en xeral, con intervalos fortes no litoral norte, onde o mar notará con máis intensidade a chegada da fronte.
O noso mar: Vento do sudoeste á mañá, do oeste á tarde e do noroeste á noite, forza 4 a 5. Forte marusía. Visibilidade mala á mañá e regular á tarde e á noite. Mar de fondo do noroeste, con ondas de 2.5 a 3.5 metros á mañá, 3.5 a 4.5 metros á tarde e 4 a 5 metros á noite.
