Unha vintena de persoas participaron este xoves 12 de marzo na nova edición dos encontros veciñais Un café co alcalde celebrada desta volta en Moimenta. O alcalde, José Ramón Romero, acompañado do tenente de alcalde, Luís Ruiz, e o concelleiro, Marcos Fajardo, mantiveron un encontro cos residentes para atender as demandas e necesidades da parroquia.
Durante o encontro o alcalde e os demais membros do Goberno local deron conta das últimas actuacións realizadas na parroquia derivadas de peticións veciñais realizadas de xeito individual ou colectivo e tomaron nota das novas peticións veciñais xurdidas.
Con estes encontros o que se busca é un contacto máis directo coa veciñanza e darlles a oportunidade de que trasladen as súas peticións e demandas sen necesidade de ter que desprazarse ao Concello. Estas xuntanzas veciñais son un complemento das que o alcalde e demais concelleiros manteñen semanalmente de xeito individual.
A próxima das xuntanzas será na parroquia de Bealo.
