Tanxugueiras está de aniversario. Tras unha década marcando un antes e un despois na música galega, Sabela Maneiro, Aida Tarrío (Aguiño, Ribeira, 1997) e Olaia Maneiro anuncian o seu regreso subindo de novo ao escenario do recinto máis grande do noroeste peninsular: o Coliseum da Coruña. As entradas para a cita, que terá lugar o 17 de outubro, estarán dispoñíbeis desde as 12:00 horas do mércores 4 de marzo na páxina web oficial de Tanxugueiras.
O directo, que será a única oportunidade de ver o grupo en Galicia ao longo de 2026, preséntase como un concerto “único e exclusivo”. Explican que alén de celebrar os seus dez anos enriba dos escenarios, esta actuación “marca un momento profundamente simbólico na nosa traxectoria: a estrea en directo no país do noso cuarto traballo discográfico, O Cuarto“.
Este álbum, producido xunto con Iago Pico e Gabi Fernández, reflicte a evolución artística do trío cara a unha proposta máis madura e reafirma o seu compromiso coa lingua e o folclore galegos, “piares esenciais” da súa identidade.
