O Concello de Rois abre este mércores 1 de abril o prazo de inscrición para a VII Andaina do Santo Isidro Letras Galegas, unha proposta de carácter non competitivo que está programada para o vindeiro domingo 17 de maio. A iniciativa convida á veciñanza e ás persoas visitantes a gozar dunha xornada de actividade física ao aire libre, percorrendo as fermosas paraxes do municipio.
A Andaina do Santo Isidro, que naceu como homenaxe ás letras galegas e este 2026 chega á súa sétima edición, terá saída e meta no Polideportivo de Urdilde e desenvolverase sobre un circuíto sen apenas desnivel de 11 quilómetros na compaña das nosas coplas.
Ao igual que nos últimos anos, a andaina homenaxeará en cada punto quilométrico a autoras e autores recoñecidos no Día das Letras con sinais que recollerán información sobre a súa obra. Todas as persoas participantes poderán participar no sorteo dunhas zapatillas de deporte facéndose unha foto diante dalgún destes sinais e publicándoa en aberto antes do 24 de maio en Facebook ou Instagram co cancelo #Roiscoasletras.
As inscricións poderán facerse ata o mércores 13 de maio ás 24.00 horas na páxina emersport.es e teñen un custo de 5 euros. Os menores de idade participarán gratis e deberán acudir acompañados dunha persoa adulta.
A proba sairá ás dez da mañá, estando fixada a recollida de dorsais entre as 8.30 e as 9.30 horas, e á altura do quilómetro 6 contará cun punto de avituallamento no que as persoas participantes poderán repoñer forzas.
