O pasado xoves 26 de febreiro celebrouse a segunda sesión ordinaria do pleno da Corporación de Rianxo deste 2026 e na sesión saíron adiante acordes de grande relevancia como a auditoría (aprobada por unanimidade) sobre a rede de saneamento para planificar as actuacións que cómpre levar a cabo nela para mellorar o seu funcionamento. Tamén foi aprobado por unanimidade o irmandamento co Concello da Estrada coa finalidade de fortalecer os vínculos culturais, históricos e sociais existentes entre os dous pobos e representados na unión de Castelao e Virxinia Pereira.
Ademais, todos os grupos da Corporación apoiaron a adhesión ao convenio para o desenvolvemento do denominado parque arqueolóxico da Idade do Ferro, un proxecto que segundo fixo saber o alcalde Julián Bustelo “necesariamente temos que reconfigurar e impulsar”.
A maiores, aprobouse por unanimidade a adhesión ao convenio para o desenvolvemento dunha administración dixital “a partir do cal poderemos seguir empregando, e poñendo a disposición da veciñanza, ferramentas para unha prestación máis eficiente dos servizo públicos”, informou o rexedor”. En concreto, este acordo senta as bases para a participación de Rianxo no acordo de Administración Electrónica da Xunta e a FEGAMP para compartir plataformas, recursos e servizos dixitais que melloren o día a día da veciñanza. A este respecto, o BNG avogou por habilitar unha Aula CeMIT en Rianxo que contribúa á capacitación tecnolóxica da cidadanía de Rianxo.
