O Concello de Padrón entregou o XXXV Premio Literario Camilo José Cela ao escritor e enxeñeiro industrial Fran Fernández Dávila pola súa obra A lingua dos ósos. O galardón está dotado con 1.500 euros e unha estatuíña co busto do premio Nobel.
A entrega tivo lugar na sede da Fundación Camilo José Cela e contou coa participación do alcalde de Padrón, Anxo Arca, e da directora da entidade, Covadonga Rodríguez.
Durante o acto, Anxo Arca destacou as achegas literarias do autor, natural de Nigrán, e puxo en valor a súa traxectoria e versatilidade creativa. O rexedor lembrou tamén que Fran Fernández Dávila xa fora recoñecido anteriormente co premio de poesía Rosalía de Castro.
Pola súa banda, o gañador amosouse “inmensamente feliz e agradecido” por recibir un premio que cualificou de “tan prestixioso”. Fernández Dávila agradeceu ademais ao Concello de Padrón “o seu compromiso inquebrantable coa cultura e por manter vivo este premio ano tras ano”. O escritor destacou tamén que, entre os 168 relatos presentados nesta edición, resultase gañador un texto escrito en galego.
O acto concluíu cun concerto de música a cargo de alumnado da Escola de Música Municipal de Padrón. Natalia, Martiño e Raúl interpretaron varias pezas ao piano, saxo e trompeta, poñendo o broche musical á entrega do galardón.
