O Concello de Padrón reafirmou este 8 de marzo o seu “compromiso firme e innegociable coa igualdade real e efectiva” durante o acto institucional do Día Internacional da Muller, no que se celebrou unha nova edición da gala das Rumorosas 2026, destinada a recoñecer o papel das mulleres do municipio.
A concelleira de Igualdade, Mariló Saco, destacou durante a súa intervención a vontade do goberno local de “redobrar esforzos para construír unha contorna máis xusta, segura e equitativa para todas”, ao tempo que rendeu homenaxe ás mulleres da vila: “ás traballadoras, ás coidadoras, ás mozas que soñan cun futuro sen límites e ás nosas maiores que loitaron para conseguir o que hoxe temos”.
Oito mulleres recoñecidas como Rumorosas 2026
O acto, conducido pola artista Sheila Patricia, tivo como protagonistas a oito mulleres que recibiron o recoñecemento Rumorosas 2026: Lola Paz, Amparo Acosta, Anabel Rivas, Carmen Osorio, Catalina Pereira, María Teresa López, Verónica Blanco e Eneida León.
Con este recoñecemento, o Concello quixo visibilizar o papel de mulleres que, co seu esforzo diario e a súa traxectoria profesional e humana, contribuíron ao desenvolvemento social e económico da localidade.
Entre elas atópase Lola Paz, mestra de primaria durante 38 anos e actualmente vinculada ao voluntariado de San Vicente de Paúl; ou Amparo Acosta, pioneira feminina no sector industrial ao incorporarse hai máis de catro décadas á empresa Picusa.
Tamén foi recoñecida Anabel Rivas, catedrática xubilada de Latín e Grego que dedicou máis de corenta anos ao ensino e que, durante a gala, advertiu da importancia de manter viva a loita pola igualdade: “A xente máis nova está a baixar a garda. Debemos coidar e fortalecer todo o que xa conseguimos”.
Pola súa banda, Carmen Osorio, que estivo á fronte da Tienda Mundial durante catro décadas, reivindicou que “ás mulleres aínda nos queda moito camiño por percorrer, pero con respecto, forza e determinación somos capaces de acadar todo o que nos propoñamos”.
A gala tamén destacou a nova xeración representada pola futbolista Catalina Pereira, integrante da Selección Galega Sub-16 feminina, quen animou ás mozas a non renunciar aos seus soños “por ser mulleres”.
Completan a lista María Teresa López, responsable da histórica Joyería Escotti, fundada en 1865; Verónica Blanco, bióloga e investigadora en biotecnoloxía na Universidade de Santiago de Compostela; e Eneida León, adestradora persoal con máis dunha década de experiencia promovendo hábitos de vida saudables.
Compromiso institucional coa igualdade
Durante o acto tamén se deu lectura ao manifesto institucional, no que Mariló Saco reafirmou o compromiso municipal coa prevención e erradicación da violencia machista, co reforzo dos programas de atención e protección ás vítimas.
Entre as liñas de actuación destacadas figuran tamén a promoción da igualdade no ámbito laboral, o impulso de medidas que favorezan a conciliación e corresponsabilidade, así como a educación en valores igualitarios para garantir un futuro libre de discriminación.
Ademais, o Concello comprometeuse a visibilizar o papel das mulleres na vida cultural, social e económica de Padrón, recoñecendo tanto as súas achegas históricas como o seu papel no presente.
