O Concello de Outes acollerá este venres, 27 de marzo, o acto final de presentación de resultados do proxecto Renatur_Outes, unha xornada aberta á veciñanza que combinará balance, divulgación e novos compromisos arredor do río Tins. A cita, que comezará ás 16.00 horas no Auditorio Municipal da Casa da Cultura, terá como eixo central a sinatura dun acordo de custodia que marcará a continuidade do traballo desenvolvido.
O acto institucional contará coa participación do alcalde de Outes, Francisco Calo; da directora da Fundación CEER, Inês Gusman; e do director da Fundación Montescola, Joám Evans. Tamén asistirán representantes da Fundación Biodiversidad do Ministerio para la Transición Ecológica y el Reto Demográfico, xunto co equipo técnico e investigador da Universidade da Coruña, Universidade de Santiago de Compostela e Universidade de Vigo, ademais de membros da comunidade local.
Un acordo para dar continuidade
Un dos momentos centrais da xornada será a sinatura dun acordo de custodia fluvial entre a Fundación CEER, como organismo representativo das universidades, o Concello de Outes e A Fundación Montescola.
Este marco de colaboración nace coa vontade de darlle continuidade ao traballo realizado, mantendo activo o interese polo río Tins. A proposta aposta por consolidar unha rede de colaboración estable entre administración, ámbito científico e tecido social, co foco posto na conservación e no coidado do entorno.
A iniciativa sitúa tamén sobre a mesa a importancia de que este tipo de proxectos se manteñan no tempo, apoiándose nun compromiso compartido e a longo prazo.
Un programa aberto á veciñanza
O encontro desenvolverase ao longo da tarde cun programa que combinará momentos institucionais, divulgación e espazos de encontro e diálogo:
16.00 h: Café de benvida
16.30 h: Apertura institucional
17.00 h: Inauguración dos novos paneis divulgativos e do bosque comestible
18.30 h: Sesión de gobernanza
19.30 h: Peche da xornada con petiscos e agasallos
As persoas interesadas pódense inscribir a través do correo comunicacion@fceer.org ou de forma presencial ou telefónica no Concello de Outes (981 85 00 03).
Un percorrido polas universidades galegas
Antes da cita final en Outes, o proxecto percorreu as tres universidades públicas galegas. As universidades de Santiago de Compostela, Vigo e A Coruña acolleron as pasadas semanas as xornadas de presentación dos resultados, nas que o río Tins se presentou como un exemplo vivo de restauración ecolóxica e colaboración territorial.
Estes encontros permitiron compartir co ámbito universitario tanto os datos acadados como as aprendizaxes xeradas, nun diálogo aberto entre ciencia e territorio.
Un peche que abre novos camiños
O acto deste venres supón o peche deste percorrido académico e técnico, pero tamén marca un novo punto de partida no propio territorio.
A xornada permitirá facer balance do proceso desenvolvido e reforzar o vínculo entre o río Tins e a comunidade que o rodea, coa mirada posta na continuidade dun traballo que seguirá evolucionando co compromiso das entidades asinantes e da propia veciñanza.
Renatur_Outes é froito da colaboración entre o ámbito universitario, o Concello de Outes e as fundacións CEER e Montescola. O proxecto conta co apoio da Fundación Biodiversidad do Ministerio para la Transición Ecológica y el Reto Demográfico (MITECO) no marco del Plan de Recuperación, Transformación y Resilencia (PRTR), financiado pola Unión Europea – Next GenerationEU.
