Os Xardíns de Valle-Inclán acollen desde hoxe a exposición A Camelia na provincia da Coruña, unha mostra itinerante organizada pola Asociación Española da Camelia co financiamento da Deputación da Coruña.
Na inauguración participaron a concelleira de Turismo, Estefanía Ramos, e a presidenta da entidade organizadora, Carmen Salinero.
A exposición está composta por unha serie de tótems informativos que combinan contidos divulgativos e fotografías arredor da camelia. Nunha das súas caras inclúense imaxes de gran formato de destacadas figuras galegas de ámbitos como a cultura, o deporte, o cinema, a música ou o xornalismo, posando coa flor como elemento protagonista.
Os paneis ofrecen tamén información sobre a Ruta da Camelia de Galicia, con datos e fotografías dos xardíns da provincia que forman parte deste itinerario, así como contidos divulgativos en formato “Sabías que…?”, con curiosidades e aspectos de interese sobre esta especie ornamental.
A mostra está concibida como un percorrido ao aire libre, accesible e visualmente atractivo, que se complementa con distintas variedades de camelias naturais en macetas de gran formato.
Esta iniciativa serve ademais de antesala á IV edición da Mostra da Camelia, que se celebrará os días 21 e 22 de marzo na Casa Mariñeira, reforzando así a aposta do municipio pola divulgación e promoción desta flor emblemática.
