O PSOE de Rianxo emitiu un comunicado no que mostra a súa “profunda decepción” porque, segundo din, “os grupos Rianxo en Común, PP e BNG negáronse a admitir e debater no pleno municipal a moción presentada polos socialistas relativa á valoración de novos puntos de vertido, á monitoraxe ambiental, ao tratamento en terra dos sedimentos e á análise de contaminantes nos dragados”. Para o PSdG de Rianxo “é incomprensíbel que se vetase o debate dun asunto de máxima actualidade e transcendencia para o noso municipio e para o conxunto da ría de Arousa, especialmente nun momento no que as confrarías veñen manifestando publicamente a súa preocupación pola xestión dos vertidos derivados dos dragados do río Lérez e polos posíbeis impactos ambientais, económicos e sociais”.
A moción socialista propoñía instar á Xunta de Galicia e ao Goberno do Estado a valorar dous novos puntos de vertido para as Rías Baixas (zona Vigo-Pontevedra e Arousa-Noia), baixo criterios ambientais, ecolóxicos e socioeconómicos rigorosos; garantir a monitoraxe e análise periódica de metais pesados e outros contaminantes nos dragados; promover o tratamento en terra e alternativas seguras antes de autorizar vertidos; e asegurar a participación activa das confrarías na planificación dos dragados e dos puntos de vertido.
E engaden: “Desde o PSOE de Rianxo entendemos que este é o momento de estar ao lado dos mariñeiros e mariñeiras, dos mariscadores e mariscadoras, que están a vivir unha situación crítica. A caída da produción, a incerteza ambiental e a falta de respostas claras por parte das administracións están a poñer en risco o sustento de moitas familias. Rianxo non pode mirar para outro lado. Somos vila mariñeira, dependemos da saúde da ría e do futuro do noso sector primario. Negarse a debater é negarse a escoitar e a asumir responsabilidades”.
