O PSOE de Rianxo emitiu un comunicado sobre o estado no que se atopa a rede viaria do concello, poñendo o foco nas vías recentemente asfaltadas que, segundo indica o grupo, presentan “un rápido deterioro con fochancas en pistas de apenas dous meses, o que está a xerar malestar e problemas no día a día dos veciños e veciñas”. Tamén reclaman urxencia en arranxar a rede de núcleos como Pousada no Araño e Quintáns, en Isorna, zonas que “seguen á espera de actuacións comprometidas hai máis de dous anos”. Os socialistas reclaman “maior control e calidade das actuacións” co fin de evitar que se teña que actuar en obras recentes.
Ademais, subliñan “a necesidade de planificar as actuacións en zonas sensíbeis, evitando casos como o de Brión, onde se asfaltaron áreas protexidas sen explicacións”. Tamén esixen “garantir unha correcta drenaxe, evitando que a auga afecte ás vivendas e que a veciñanza teña que instalar solucións improvisadas que dificultan o acceso, especialmente para persoas con mobilidade reducida”.
Por outra banda solicitan facer públicos os criterios do plan de asfaltados e pide aclaracións sobre os investimentos anunciados.
