A Ría de Arousa foi escenario este sábado do inicio do Campionato Galego da clase ILCA, que organiza o Club Náutico e Deportivo de Riveira ata o vindeiro luns 30 de marzo. A competición reúne a preto dun centenar de regatistas de toda Galicia, consolidándose como unha das probas máis importantes do calendario autonómico de vela lixeira.
O vento do nordeste foi o gran protagonista da xornada inaugural, soprando con intensidades constantes de entre 15 e 16 nós, o que permitiu ofrecer un gran espectáculo na ría arousá, especialmente nas categorías olímpicas ILCA 6 feminino e ILCA 7 masculino.
O Comité de Regata logrou completar dúas mangas, rápidas e esixentes, que os participantes afrontaron con solvencia grazas á súa experiencia neste tipo de condicións.
En ILCA 4 masculino, o liderado é para Jaime Díaz, do Club Náutico Marina Coruña, tras asinar un primeiro e un segundo posto (3 puntos). Séguelle Alejandro Pérez, empatado a puntos, mentres que a terceira praza é para Manuel Pérez, con 6 puntos.
En categoría feminina de ILCA 4, domina Sofía Soliño, con 12 puntos, seguida de Alexandra Lis, con 57, e Ana Costas, con 59.
En ILCA 6 masculino, o regatista local Bruno Iglesias, vixente campión da Copa de España, sitúase á fronte con pleno de vitorias (2 puntos). Séguenlle Ramón Rey, con 4 puntos, e Samuel Cerdeira, con 6.
En ILCA 6 feminino, lidera Lucía Vaquerizo, con 20 puntos. A segunda posición é para Marta Cora, con 39, e a terceira para Candela Asensio, con 50.
Por último, en ILCA 7 —categoría exclusivamente masculina— encabeza a clasificación Carlos González, con 2 puntos. Completan o podio provisional Roque Viejo, con 5 puntos, e Jacobo Montero, con 7.
O taboleiro de anuncios da regata recolle unha modificación no horario da segunda xornada, fixando a saída da primeira proba ás 12:00 horas do domingo, tendo en conta o cambio ao horario de verán.
O campionato conta co patrocinio de Frinsa, Congalsa, Gadis, A Poutada e Álvarez Riveira, ademais da colaboración do Concello de Ribeira e a Real Federación Galega de Vela.
