Este mércores 11 de xaneiro o alcalde rianxeiro, Julián Bustelo, mantivo unha xuntanza de traballo co xefe de Policía Local, co responsábel do posto da Garda Civil de Rianxo e con representantes da Asociación Rianxeira de Empresarios (ARE). O obxectivo da reunión foi trasladar ás empresas integrantes da asociación os detalles das actuacións que o Concello, a Policía Local e a Garda Civil veñen realizando de xeito conxunto no marco do dispositivo de vixilancia e seguridade cidadá habilitado hai unhas semanas logo que se que produciran furtos en establecementos do concello.
O rexedor trasladou ás empresas que as actuacións do dispositivo de seguridade terán continuidade e que o obxectivo a maiores “é reforzar algúns aspectos do devandito dispositivo coa finalidade de prever calquera situación indesexábel”.
Julián Bustelo quixo lanzar unha mensaxe á cidadanía: “Rianxo é un pobo tranquilo e as estatísticas así nolo confirman: no que vai de ano levamos menos delitos que no mesmo período do ano pasado. Nós seguiremos traballando para que isto siga sendo así e para garantir que a nosa xente se sinta segura nas súas casas, na rúa e nos seus postos de traballo”.
