En relación ao comunicado emitido este luns 30 polo BNG relativo ás deficiencias do Centro de Saúde de Corrubedo e á necesidade de arranxalas, o Goberno local de Ribeira que encabeza María Sampedro achegou unha serie de datos cos que quixo saír ao paso das críticas e compartir cos nacionalistas e coa veciñanza as iniciativas postas en marcha para solucionar as ditas eivas.
Segundo fan saber, o Concello “xa trasladou xa no mes de febreiro á Xunta as melloras necesarias no inmóbel”.
Engaden que o Goberno galego está a avaliar as posibilidades para a eliminación das barreiras arquitectónicas no Centro de Saúde de Corrubedo despois da visita realizada no 24 de febreiro por parte da alcaldesa de Ribeira, María Sampedro, e o xerente da Área Sanitaria de Santiago de Compostela e Barbanza, Ángel Facio, acompañados de persoal técnico da Consellería de Sanidade, enxeñeira municipal e profesionais do propio centro.
Durante o encontro de traballo analizaron o estado do edificio para “que sexa accesíbel na súa totalidade, incluíndo a parte baixa, coa finalidade de estudar as diferentes alternativas de remodelación do inmóbel, ademais de recoller as demandas dos propios traballadores do Centro de Saúde”.
“Queremos mellorar as prestacións á veciñanza e isto pasa tamén pola mellora de infraestruturas para garantir a accesibilidade universal”, manifestou a rexedora, quen engade que a Xunta está avanzando cara a acometer unha reforma neste ambulatorio unha vez os técnicos rematen cos informes e tramitación.
