A concelleira de Política Social de Rianxo, Ana Vidal, fixo balance dos principais logros do seu departamento nestes 1.000 días de Goberno local.
Segundo indicou, ao longo deste tempo púxose en marcha por vez primeira unha liña de axudas, dotadas con 10.000€, destinadas a apoiar as actividades impulsadas polas asociacións e nais e pais (anpas) dos centros educativos rianxeiros. Amais, sinalou no seu balance, ampliáronse os fondos para as axudas ás familias rianxeiras destinadas á adquisición de material escolar.
Para o curso 2025/2026 adxudicáronse axudas por máis do dobre que o importe correspondente ao curso 2022/2023.
Igualmente, púxose en funcionamento a Unidade de Atención Temperá do Concello de Rianxo, “un servizo que ten como obxectivo fundamental dar resposta ás necesidades transitorias ou permanentes que presentan os nenos e as nenas de 0 a 6 anos con trastornos no desenvolvemento co obxectivo de facilitar o desenvolvemento da súa autonomía persoal”. Del xa se beneficiaron case 100 familias rianxeiras, explicou a concelleira.
A edil salientou tamén a apertura dun centro terapéutico para persoas con deterioro cognitivo “un recurso moi importante para as persoas que sofren algún tipo de doenza neurodexenaritiva e un pequeno respiro para as súas familias”. Tamén se puxo en funcionamento un programa de envellecemento activo en todas as parroquias do municipio.
A concelleira engadiu que “nestes 1000 días tamén impulsamos un un servizo de préstamo gratuíto de axudas técnicas (camas con carro elevador, grúas eléctricas, asentos xiratorios de baño, etc.) para apoiar ás persoas en situación de dependencia, así como ás persoas coidadoras”.
E concluíu: “Tamén desbloqueamos o proxecto para a construción do centro de día no Pazo de Rianxiño e vimos traballando coa Deputación da Coruña para a posta en funcionamento dunha residencia para atención das nosas persoas maiores; máis axiña que tarde teremos en funcionamento estes importantes servizos”.
