O Concello de Boiro está a desenvolver, no marco do proxecto EnClave, un programa de screening visual para o desenvolvemento de cribados na contorna educativa. A concelleira de Ensino, Carmen Silva, estivo na mañá deste 18 de marzo, mércores, no CEIP Praia Xardín para coñecer de primeira man como se están a desenvolver as xornadas.
O principal obxectivo dese programa é a detección temperá de posíbeis problemas visuais no alumnado mediante a realización dun screening visual non invasivo. Deste xeito o que se busca é identificar anomalías que poidan dificultar o proceso de aprendizaxe, recomendando posteriormente unha revisión optométrica completa en aqueles casos nos que se considere necesario.
O programa desenvolvese en colaboración coa Universidade de Santiago de Compostela e o screening está realizado polo alumnado do Grao en Óptica e Opotometría e o Máster en Optometría xunto co profesorado docente.
A actividade está dirixida ao alumando de 2º e 3º de primaria por ser as idades consideradas máis axeitadas para a detección de anomalías visuais. As probas que se realizan son a medición da agudeza visual monocular; unha valoración da visión das cores; avaliación da visión binocular; detección de anomalías refractivas; e revisión de posíbeis alteracións orgánicas.
O Proxecto EnClave do Concello de Boiro é un programa pioneiro e innovador que naceu no curso 2021/2022 co obxectivo de atallar e previr as principais problemáticas detectadas no ámbito educativo como o acoso escolar, o benestar emocional ou a saúde no alumnado dos centros de primaria e secundaria do municipio.
Trátase dun programa vivo que se vai adaptando cada curso escolar en función das necesidades detectadas polo persoal docente e a comunidade educativa para promover unha convivencia positiva, inclusiva e corresponsábel na contorna escolar.
